Dag 14: Lusaka

Leopard lodge personeel staan in 'n ry om met 'n stewige handdruk en (steeds) groot glimlagte te groet..gaan hul 'Good morning Madame', baie 'Thank you's' en Luca op 'warthog-duty' baie mis.

Die pad Lusaka toe lê voor..en opstock vir die volgende ruk..vleis begin na 2 weke 'n aardige klankie ontwikkel.

'n Mall is mos maar 'n mall is 'n mall...en gou is die s(pens) vol.  Lekker om weer die skuim van 'n cappuchino te proe en restaurant-kos te eet.

Ons kamp weer vir die eerste keer na byna 'n week van vyf ster geriewe by Pioneer kamp net buite Lusaka en die vuurtjie langs die bakkie het weer sy bekoring.

Werner se ou tsetse-steekplekke swel en jeuk..die oorlog duur voort! Die steek wys blykbaar e8ers sy staal so 5 dae na die geveg..eina!  'n Besope Vrystater in die kamp se kroeg hou Werner darem so diep in gesprek dat hy nie kans kry vir krap nie..

Dag 13: Visvang en Vaarwel

Danksy ons kosbare vriende Jacques en Sanet, kon ons 'n besonderse paar dae by Leopard lodge spandeer.  Nie net het hulle raad, insette en aanwysings ons trip sover baie glad laat verloop nie..die gasvryheid en liefde waarmee hul die lodge met ons gedeel het is 'n massiewe bederf!!  Ons sien uit om staaltjies oor Leopard met hulle te deel..dankie julle!!

Ons is vir oulaas saam Reuben met die boot rivier toe..elkeen met 'n visstok en 'n sundowner!

My visserman moes my eers touwys maak..waar om die lyn met my vinger vas te knyp en wanneer om die katrol se houvas af te haal.  Hy is so 'n goeie leermeester dat ek gou 2 vissies vang..sy hoek is egter leeg..  Visserman sal maar 'n vleisie moet braai.

Ons groet die oopbekooievaar, byvreters klim in hul nessies in die rand van die oewer en Max vreet vir oulaas die gras reg langs ons huisie.

Hierdie is 'n spesiale plek met spesiale mense..ons het dankbare harte!!

Dag 12: Hot Spring

Net 'n wildrit ver van Leopard lodge is een van die wonders van die aarde.

Uit oranje-rooi klip borrel kokende water uit verskillende gate omring deur soutkristalle. Die kookwater loop met 'n dun riviertjie met soutwalle al kokende tot binne in die Kafue rivier.  Puku en ooievaars staan oral langs die kookwater-rivier..maar nie een durf sy dors les nie.  Gids David vertel hulle het juis 'n rukkie gelede 'n (gekookte) voël by die water gekry..hy kon sy dors nie hou nie..shame!!

Die plaaslike bevolking noem die warm bron die 'pampoen' hot spring omdat 'n groot pampoen daarin gaar sal word (en ek dink die oranje kleur van die klip het ook iets daarmee te doen). Besonders!!

Dag 11: Katte galore!

Dis nog pikdonker, maar ons is op vir 'n vroeë wildrit..gepantser met 2 lae klere en balaklavas.  Die oulike gidse David en Reuben het die voertuig gister al met die Lunga pont oor die rivier gevat ..ons sal met die boot vaar tot aan die oorkant..in die donker..ons hoop Max vreet nog gras!

Behalwe Puku, Lichtenstein hartbees (-1) en ander gediertes..word ons bederf met ses leeuwyfies en twee (vrek cute) welpies wat aan die vermiste hartbees vreet.  Die Zambiese leeus is veel donkerder van kleur..of stof..en vreet gulsig terwyl ons hul dophou.  'n Agterdogtige welpie pen ons vas met sy groen ogies en skoert later baie wantrouig die langgras in.

Laatmiddag word ons weer bederf met 'n aandrit.  Weer gepantser..dit raak gou ysig as die son sak..en ys klingel in G&T.

Die bos is maar stil..oulike nagapies spring tussen 'Sausage' bome en 'n muskeljaatkat(?) soek na aandete.  Gesoute kat-soeker Reuben sit hoog op sy pos..en daar is hy...Leopard lodge se luiperd!!

Hy is skrikkerig vir ons ligte, maar besluit om tog met sy kolle te spog.. Hy loop waaragtig reg rondom die voertuig, in die oopte..probeer dan en wan onder takke inkruip..en pronk dan ewe kordaat met sy voorpote op 'n stomp en kyk ons diep in die oë.  Hoendervleis!!

'n Romantiese etenstafel is by die kamp gedek langs 'n warm vuurtjie..hierdie is 'n bederfplek!!

Dag 10: Leopard Lodge

Op Leopard lodge word jy wakker met die gebrom van sy naamgenoot aan die oorkant van die rivier vanwaar jy jou koffie geniet.

'n Reuse visvanger loer in die water vir ontbyt en langkuifloeries bad en drink aan die oorkantse oewer.

Reuben neem ons weer op 'n bootvaart net voor sononder in die teenoorgestelde rigting as gister en deel sy kennis van die omgewing..met 'n breë glimlag natuurlik.  Dit wemel hier van krokodille, seekoeie en voëls.

Luiperd en hiëna roep tegelyk en die seekoei 'Max' vreet aan die grasperk terwyl ons braai..

Dag 9: Van Mumbwa tot Leopard lodge

Ons slaan die daktent vir die laaste keer af vir 'n paar dae van rus..nogal 'n lekker gedagte op die negende dag..( gedink dis veronderstel om op die sewende dag te gebeur?)

Ons gaan doen laaste inkopies in Mumbwa..met 'n lysie nogal! Wel die opsies is kool, bone of klein gedroogte vissies..nie een kom op my lysie voor nie.

Die pad tussen Mumbwa en Leopard lodge is donga op donga..en die lodge is soos 'n oase! Die personeel se groot glimglagte blink wit soos hul aangehardloop kom met klam lappies om die Mumbwa-stof van ons wange af te vee..hul wil net help en aandra..ons voel so welkom!

'n Luukse huisie is vir ons gereed..reuse muskietnet oor die wit bed..'n hengse upgrade van die Triton-skilpad se huis op sy rug.

Reuben neem ons op 'n sundowner-bootvaart op die Kafue en met die terugkom weerkaats die volmaan op die water en ons vuurtjie brand al hoog..luuks!

Dag 8: KaingU

Ons is vroeg op vir die regte rede..die daktent se 'deur' kyk die sonopkoms vierkantig (letterlik

Elke dag word sover geken aan die son se opkoms en ondergang..asof dit elke keer iets is om te vier en dit kweek 'n bewustheid oor die wonder van 'n nuwe dag wat ons bittermin in die stad ervaar of van notisie neem.

Ons doen inkopie(tjie)s by Melissas in Itezhi Tezhi se dorpie..glad nie wat ek van Melissas verwag nie..sy moet opskerp in Zambië! Haha..


Die pad na KaingU is sielsdodend. 40km in 2 en half uur is toe nou vir niemand snaaks nie..ons probeer 'n beter playlist saamstel vir die bestuurder se gemoed..en nog 'n 'bush repair' en tsetse oorlog later... Maar all good things take time..(sê die vrou wat weet)..en KaingU stel nie teleur nie.  Sou help as ons nie gedink het die "Tsetse control post" is 'n grap nie. KaingU lê teen die Kafue rivier met eilande van klip en rots sover jy kyk..

Ons klim oor berge en dale na die mooiste uitsig oor die rivier se 'rapids' waar dassies ons stip dophou.

Die kampplek is luuks op groen gras met ons eie persoonlike geriewe..dit gebeur min!

) in die oë.  Ons word saam met die son wakker. 

Dag 7: Konkamoya / Hippo bay

Gewoonlik staan ons vroeg op vir sonopkoms-koffie of 'n vroegoggend wildrit..maar vanoggend soek ons wifi saam met die boeretroos..ons het tafelkoors.. Die tafel staan (dankie tog) nog onder die einste boom..en sal 'n saamry-geleentheid na Lusaka met 'n overland-trok vol duitsers kry..phew!

Ons pad na die Itezhi-Tezhi meer kronkel deur die bosse waar 'n opgeskote olifant-bulletjie met flappende ore op ons wag..Werner bemeester die tru-rat met lof!  Dit nadat hy sy eerste 'bush-repair'-ervaring moes opdoen met tsetsies wat hom jag!! 'n Stomp het in die wiel verstrengel geraak..seker deur die tsetse's in die pad gerol..hul was behoorlik lus vir sy bloed!

Konkamoya en Hippo bay lê teenaan die meer met seekoeie in groot getalle wat die baai se naam gestand doen.  In die mooi oopte kom verras 'n volmaan ons oor die meer.  Volmaan Volhart Volstof.

Dag 6 : Kafue Kakofonie

Vanaf Livingstone ry ons 'n wille Afrika-pad tot by die hekke van die Kafue Nasionale Park.  Daar aangekom is ek in die knyp na die langpad se ruk en skud..en vra die man met bos-uniform vir 'n badkamer.  Hy wys baie beleefd 'n netjiese klip-geboutjie 'n entjie verder..met natuurlik net so 'n netjiese gat in die grond binne. Wel as die nood druk..  Net so ervaar ons die res van Kafue..sonder pretensie, sonder fieterjasies. 

Ons slaan kamp op by Nanzhila Plains met 'n uitsig oor die Nanzhila rivier waar 'n ratel snags asblikke omkeer en Swartwitpense met trots pronk.  Die area is ook bekend as die nesskropplek van die swartwang-lovebird.

Ons wildrit kry 'n bitter smakie toe ons besef dat ons alluminium kamptafel steeds stoksielalleen op gister se kampplek in Livingstone staan..hoe vergeet twee gesoute kampeerders 'n lewensgrootte blink tafel?? Moet wittebrood-koors wees..

Tsetse-vlieë laat ons gou besef dat ritte nie hier met oop vensters gedoen word nie..danksy goeie vriende se waarskuwing is ons gereed met 'n detol-spuitbottel..hulle 'velle' is dik!

Die kampplek is rof en bosagtig..en ons verlang na ons vergete tafel..ai!  'N Padda-simfonie weerklink deur Nanzhila langs 'n vuurtjie..nog nooit paddas so xilofoon-klanke hoor naboots nie..'n Kafue-kakofonie!

Dag 5: Livingstone en Victoria Valle

Livingstone is veel groter as wat ons verwag het en Dr David se beelde pryk oral in die dorp.

Muskiete vlieg hier soos muggies rond..ons hoop maar hulle is die gesonde soort!  Oom Olifant loop weer digby ons kampplek verby en g&t smaak vorentoe langs die Zambezi.

Vic Valle is natuurlik in 'n ander klas..ons asems word weggeslaan deur die donderende waters wat sonder ophou oorbruis.  Die 'rook' van die Valle kan van die Waterfront waar ons bly gesien word, maar dis die oorverdowende gebruis wat ons nader lok..

Die Makololo stam het juis destyds vir Dr Livingstone gevra of hy ook die rook in sy land het wat so luide gedruis maak.  Die stam het nooit nader gegaan om te sien dat dit die Valle is wat so 'rook' nie..hulle het net gesê "Mosi oa tunya" (smoke does sound there).

Dankbaar dat ons nader kon gaan...papnat gesproei kon word en die mooiste sonsondergang kon geniet..

Dag 4 : Some crap moments surrounded by great ones

Wel dag 3 het ons genomineer as rusdag..dis allermins ons wittebrood..


Dag 4 is ons laaste oggend in die vriendelike Botswana en ons eerste middag in Zambië.


Almal waarsku dat Afrika nie vir sissies is nie..ons besef hul verwys verseker na die Zambiese grenspos..enige sissie sal onmiddelik omdraai en eerder weer op die Chobe gaan vaar.  Wat 'n reuse deurmekaarspul!  Die grenspos-frustrasie bereik nuwe hoogtes wanneer ons besef dat die Zambiese Kwacha wat ons sorgvuldig in Suid-Afrika geruil het, ongeldig is en reeds verlede jaar uitgefaseer is..ou note..nou beter bekend as munte!! Die Zambiërs kyk natuurlik ons gegewe perd in die bek..


Maar soos wat Johan Bakkes Ellen Potter aanhaal.. "Every great adventures have moments that are really crap."


Aangekom by die Victoria Falls Waterfront is die Zambezi net so bekoorlik soos die Chobe. Ons sluit nog 'n dag af met die Afrika-sonsondergang oor Afrika-waters...Amarula in die hand!